बढी पानी पर्ने पुर्वानुमान भएको स्थानमा रात्रि बस संचालनमा प्रतिबन्ध लगाउने सरकारको निर्णय

गृह मन्त्रालयले खतराको संकेत देखिएका क्षेत्रमा रात्रीबस सञ्चालनमा रोक लगाउने निर्णय गरेको छ।

प्रतिनिधि सभाको शुक्रबारको बैठकमा बोल्दै गृहमन्त्री रवि लामिछानेले जल तथा मौसम विज्ञान विभागबाट जोखिमयुक्त क्षेत्र घोषणा गरिएका ठाउँमा रात्रीबस चल्न नदिने निर्णय भएको जानकारी गराएका हुन्।

‘रेड ट्राभल एड्भाइजरी जारी भएका जिल्ला र क्षेत्रमा तत् तत् दिनमा रात्रिकालीन सवारी नचलाउने व्यवस्था यातायात व्यवस्था विभाग र यातायात व्यवसायीहरूले मिलाउने निर्णय भएको छ,’ उनले भने, ‘सबैतिर रात्रिकालीन सवारी बन्द गर्ने होइन। रेड ट्राभल एड्भाइजरी जारी जिल्ला र क्षेत्रमा तत् तत् बेला सवारी नचलाउने हो।’

बाढीपहिरोबाट ३८ जिल्ला प्रभावित भएको गृहमन्त्री लामिछानेको भनाइ छ।

बाढीपहिरोबाट पछिल्लो २४ घन्टामा १७ जनाको मृत्यु भएको उनले बताए।