नोबेल शान्ति पुरस्कार विजेता नर्गिस मोहम्मदीको स्वास्थ्य अवस्था गम्भीर: अस्पताल भर्ना

इरानकी प्रख्यात मानव अधिकारवादी तथा २०२३ की नोबेल शान्ति पुरस्कार विजेता ५४ वर्षीया नर्गिस मोहम्मदीको स्वास्थ्य अवस्था निकै नाजुक बनेपछि उनलाई जेलबाट अस्पताल भर्ना गरिएको छ। उत्तर-पश्चिम इरानको जन्जान जेलमा १३ वर्षको कैद सजाय काटिरहेकी मोहम्मदीको रक्तचापमा आएको भारी गिरावट र हृदयघातको आशंकाका कारण उनको अवस्था चिन्ताजनक रहेको परिवारले जनाएको छ।

लामो समयदेखि मुटु र फोक्सोको समस्याबाट पीडित उनलाई समयमै उपचार नदिइएको भन्दै नोबेल समिति र उनका आफन्तहरूले तत्काल तेहरानस्थित सुविधासम्पन्न अस्पतालमा स्थानान्तरण गर्न माग गरेका छन्। पटक-पटक गरी ३१ वर्षको जेल सजाय र १५४ कोर्राको सजाय सुनाइएकी मोहम्मदीलाई गत डिसेम्बरमा सरकारको आलोचना गरेको आरोपमा पुनः पक्राउ गरिएको थियो। हाल उनको जीवन जोखिममा रहेको भन्दै अन्तर्राष्ट्रिय समुदायले इरानी अधिकारीहरूमाथि उचित उपचार र रिहाइका लागि दबाब बढाइरहेका छन्।