यूएफओ सम्बन्धी गोप्य फाइल सार्वजनिक भएपछि अमेरिकामा फेरि चर्कियो एलियन बहस

अमेरिकाको क्यालिफोर्नियामा बस्ने ६९ वर्षीया एलेन लोपेरेना बाल्यकालदेखि नै यूएफओ सम्बन्धी रहस्यको उत्तर खोजिरहेकी छन्। उनले आफ्नी आमाले कपडा सुकाउन बाहिर राख्ने क्रममा आकाशमा यूएफओ देखेको दाबी गरेपछि यस विषयमा चासो बढेको बताएकी छन्।

त्यस्तै, टेक्सासका थेरापिस्ट जोन एरिक एगेले आफू बाल्यकालदेखि नै “अनुभवकर्ता” रहेको बताएका छन् भने अर्का टेक्सास निवासी ३६ वर्षीय संगीतकार ड्यानियल जोन्स पनि आफ्नो गाउँ नजिक भएको एउटा घटनाबारे थाहा पाएपछि यूएफओ र एलियन सम्बन्धी अनुसन्धानमा रुचि राख्न थालेका हुन्।यी सबैजना शुक्रबार अमेरिकी “यूएफओ समुदाय” सँगै निकै उत्साहित देखिए, किनकि अमेरिकी सरकारले पहिलोपटक “अज्ञात असामान्य घटना” (यूएपी) सम्बन्धी १६२ वटा गोप्य फाइल सार्वजनिक गरेको छ। ती फाइलहरूमा तस्वीर, विवरण र विभिन्न अनुसन्धान सामग्री समावेश छन्।अमेरिकी राष्ट्रपति डोनाल्ड ट्रम्पले सामाजिक सञ्जाल ट्रुथ सोशलमा प्रतिक्रिया दिँदै लेखेका छन्,“अघिल्ला प्रशासनहरूले यस विषयमा पारदर्शिता अपनाएनन्। अब यी नयाँ दस्तावेज र भिडियोमार्फत जनताले आफैं निर्णय गर्न सक्छन् — ‘आखिर भइरहेको के हो?’”अमेरिकी युद्ध विभागले शुक्रबार नयाँ वेबसाइटमार्फत ती फाइल सार्वजनिक गरेको हो। विभागले “यो कार्य निकै ठूलो भएकाले थप सामग्री क्रमिक रूपमा सार्वजनिक गरिने” जनाएको छ।विभागका अनुसार सार्वजनिक गरिएका सामग्रीहरू अझै “असमाधान भएका घटनाहरू” हुन् र सरकारले ती वस्तुहरूको वास्तविक प्रकृतिबारे स्पष्ट निष्कर्ष निकाल्न सकेको छैन।एमयूएफओएन (म्युचुअल यूएफओ नेटवर्क) टेक्सासका क्षेत्रीय निर्देशक जोन एरिक एगेले यो कदमलाई “सही दिशातर्फको प्रगति” भनेका छन्।उनले भने,“सरकारले केही लुकाउन खोजिरहेको जस्तो लाग्दैन। तर सार्वजनिक गरिएका धेरै कुरा हामीले पहिलेदेखि नै सुन्दै आएका विषय हुन्। अझै पनि एलियनको शरीर भेटिएको वा प्रत्यक्ष सम्पर्क भएको स्पष्ट प्रमाण छैन, तर म आशावादी छु।”

सार्वजनिक गरिएका फाइलहरूमा पुराना सैनिक मेमो, अपोलो चन्द्र अभियानका रिपोर्ट तथा यूएफओ देखेको दाबी गर्ने व्यक्तिहरूका बयान समावेश छन्।ड्यानियल जोन्सले पहिलो चरणका फाइलहरू “ठूलो खुलासा नहुने” आफूलाई पहिलेदेखि नै लागेको बताए। तर उनले भविष्यमा सरकारले अझ स्पष्ट जानकारी दिने आशा व्यक्त गरेका छन्।त्यस्तै, एलेन लोपेरेनाले सरकारको यो निर्णयप्रति उत्साह व्यक्त गर्दै भनिन्,“मैले पहिलेदेखि नै ट्रम्पले यो घोषणा गर्नेछन् भन्ने विश्वास गरेकी थिएँ। उनी इतिहासमा नाम लेखाउन चाहन्छन् र यो प्रक्रियालाई अघि बढाइरहेका छन्।”उनका अनुसार पछिल्ला केही वर्षमा यूएफओ सम्बन्धी चासो तीव्र रूपमा बढेको छ। आफू संलग्न फेसबुक समूहमा सदस्य संख्या ४० हजारबाट बढेर झण्डै १ लाख पुगेको उनले बताइन्।तर सबैजना सरकारी खुलासाबाट सन्तुष्ट छैनन्। केही यूएफओ अनुसन्धानकर्ताले सार्वजनिक गरिएका तस्वीरहरू अस्पष्ट, कम गुणस्तरका र “प्रमाणभन्दा बढी नाटकजस्तो” भएको टिप्पणी गरेका छन्।यद्यपि, यूएफओमा विश्वास गर्नेहरू अझै पनि थप खुलासाको प्रतीक्षामा छन्। एलेन लोपेरेनाले भनिन्,“केही मानिसहरूलाई त एलियन आफैं आएर सँगै खाना खान बोलाएपछि मात्र विश्वास लाग्नेछ।”