एन्ड्रयू माउन्टबेटन–विन्डसरलाई राजगद्दीको उत्तराधिकार सूचीबाट हटाउने तयारी

बेलायत सरकारले एन्ड्रयू माउन्टबेटन–विन्डसरलाई राजगद्दीको उत्तराधिकार सूचीबाट हटाउने उद्देश्यले नयाँ कानुन ल्याउने तयारी गरिरहेको छ।रक्षा मन्त्री ल्यूक पोलार्डले बीबीसीसँगको कुराकानीमा प्रहरी अनुसन्धानको अन्तिम नतिजा जे आए पनि उनलाई भविष्यमा कहिल्यै राजा बन्न नदिनु उपयुक्त कदम हुने बताएका छन्।हाल चार्ल्स तृतीयका भाइ एन्ड्रयू राजगद्दीको उत्तराधिकार सूचीमा आठौँ स्थानमा रहेका छन्। गत अक्टोबरमा उनलाई “प्रिन्स” लगायतका केही राजकीय उपाधिबाट वञ्चित गरिएको थियो। बाल यौन अपराधमा दोषी ठहरिएका वित्त व्यवसायी जेफ्री एप्स्टिनसँगको सम्बन्धका कारण उनीमाथि व्यापक आलोचना हुँदै आएको छ।सार्वजनिक पदको दुरुपयोगको आशंकामा पक्राउ परेका एन्ड्रयूलाई ११ घण्टापछि अनुसन्धानकै अवस्थामै रिहा गरिएको थियो। उनले आफूले कुनै पनि गलत काम नगरेको दाबी गर्दै आएका छन्।एक रेडियो कार्यक्रममा बोल्दै मन्त्री पोलार्डले सरकार र बकिङ्घम दरबार बीच यस विषयमा समन्वय भइरहेको बताएका छन्। उनका अनुसार प्रस्तावित कानुन संसदमा विभिन्न दलहरूको समर्थनसहित अघि बढ्ने अपेक्षा गरिएको छ, तर अन्तिम निर्णय भने प्रहरी अनुसन्धान सकिएपछि मात्र गरिनेछ।

एन्ड्रयू बस्दै आएको ३० कोठे निवास रोयल लज, विन्डसरमा प्रहरीको खोजी कार्य सोमबारसम्म जारी रहने बताइएको छ।यो प्रस्ताव कानुनका रूपमा कार्यान्वयन हुन संसदबाट पारित भई राजकीय स्वीकृति प्राप्त गर्नुपर्नेछ। साथै, राजा राष्ट्रप्रमुख रहेका १४ राष्ट्रमण्डल देशहरूको सहमति पनि आवश्यक पर्नेछ।यसअघि सन् २०१३ मा उत्तराधिकार सम्बन्धी क्राउन ऐन २०१३ मार्फत उत्तराधिकारसम्बन्धी कानुन संशोधन गरिएको थियो। त्यसभन्दा अघि सन् १९३६ मा एड्वार्ड अष्टमले गद्दी त्यागेपछि उनलाई र उनका सन्तानलाई उत्तराधिकार सूचीबाट हटाइएको थियो।लिबरल डेमोक्र्याट्स (उदार लोकतान्त्रिक दल) र स्कटिस नेशनल पार्टी (स्कटल्याण्ड राष्ट्रिय पार्टी) ले आवश्यक परे एन्ड्रयूलाई उत्तराधिकार सूचीबाट हटाउने कानुनलाई समर्थन गर्ने जनाएका छन्। केही अन्य सांसदहरूले भने एन्ड्रयू राजा बन्ने सम्भावना अत्यन्तै न्यून रहेकाले यस्तो कदम अनिवार्य नभएको तर्क गरेका छन्।अब यस विषयमा राजनीतिक तथा कानुनी प्रक्रिया औपचारिक रूपमा अघि बढ्ने अपेक्षा गरिएको छ।