हृदयविदारक दुर्घटना : अस्ट्रेलियामा एकै परिवारका तीन नेपालीको मृत्यु

अस्ट्रेलियाको भिक्टोरिया राज्यको स्टोनली भन्ने सानो ग्रामीण क्षेत्रमा घटेको एक कार दुर्घटनाले नेपाली समुदायलाई शोकमा डुबाएको छ । चितवन घर भएका एकै परिवारका तीन जना — बाबु, आमा र सानो छोरा — को घटनास्थलमै निधन भएको छ ।

परिवारसँगै यात्रामा रहेकी वृद्धा हजुरआमा भने गम्भीर घाइते अवस्थामा जीवित रहन सफल भएकी छिन्, र हाल उनको अवस्था स्थिर रहेको बताइएको छ ।घटना तब घट्यो जब उनीहरू सवार कार सब वेबाट मेन रोडमा निस्कँदै थियो । त्यही बेला तीव्र गतिमा आएको मालबाहक ट्रकले कारलाई ठक्कर दिँदा कार पूर्णरूपमा क्षतिग्रस्त भयो र तीन जीवनहरू त्यही क्षणमा निभे । उद्धार टोलीले घाइते वृद्धालाई हेलिकोप्टरमार्फत तुरुन्तै अस्पताल पुर्‍यायो ।दुर्घटनाको खबरले अस्ट्रेलियामा बसोबास गर्ने नेपाली समुदाय मात्र होइन, मातृभूमिसम्मका हरेक मनलाई चस्स पारेको छ । आफ्ना प्रियजनको अकाल मृत्युले परिवार र नातेदारहरूमा अपूरणीय पीडा छाएको छ ।

भिक्टोरियाका वाणिज्यदूत नीराजन गौलीले यस घटनालाई "निकै पीडादायक र हृदयविदारक" भन्दै दुःख व्यक्त गरेका छन् ।एनआरएन भिक्टोरियाका संयोजक महादेव धानुकले घाइते वृद्धाको उपचार र परिवारका अन्य सदस्यहरूसँग निरन्तर सम्पर्कमा रहँदै आवश्यक सहयोगका लागि आफूहरू तयार रहेको बताएका छन् ।एकै परिवारका तीन जीवनहरू एकै क्षणमा हराउँदा अस्ट्रेलियाको आकाश पनि शोकमग्न देखिएको छ — हाँसो, माया र सपनाले भरिएको त्यो सानो परिवार अब सम्झनाको रूपमा मात्र बाँकी रहनेछ ।