रूसले बजेट घाटा थेग्न पहिलो पटक सञ्चितिको भौतिक सुन बेच्न सुरु
- Nov Sun, 2025
- in ग्लोबल गन्थन
काठमाडौ। रूसको केन्द्रीय बैंकले पहिलो पटक आफ्नो विदेशी मुद्रा सञ्चितिमा रहेको भौतिक सुन बिक्री गर्न थालेको छ, जसको उद्देश्य वित्त मन्त्रालयमार्फत राज्यको बजेट घाटा पूर्ति गर्नु हो। बुधबार बैंकले यो जानकारी दिएको हो।
यसअघि राष्ट्रिय सम्पत्ति कोष (NWF) को सुनको कारोबार अधिकांश रूपमा ‘भर्चुअल’ मात्र हुन्थ्यो अर्थात् सरकारले सुन केन्द्रीय बैंकलाई बेच्थ्यो तर सुन देशभित्रै सञ्चितिमा रहन्थ्यो।
रूससँग हाल २,३०० टनभन्दा बढी सुन सञ्चिति छ, जुन विश्वमा पाँचौँ ठूलो हो। केन्द्रीय बैंकका प्रवक्ताका अनुसार पछिल्ला वर्षहरूमा स्वदेशी सुन बजारको तरलता बढेकाले अब युआन कारोबारबाहेक सुनको प्रत्यक्ष बिक्री पनि गरिन थालिएको हो। बिक्रीको समय र परिमाण भने गोप्य राखिएको छ।
युक्रेनमा पूर्ण स्तरको आक्रमण हुनुअघि राष्ट्रिय सम्पत्ति कोषमा ४०५.७ टन सुन थियो। त्यसयता बजेट घाटा थेग्न ५७% अर्थात् २३२.६ टन सुन बिक्री भइसकेको छ र नोभेम्बर १ सम्म १७३.१ टन मात्र बाँकी छ। सुन र युआनसहित कोषको कुल तरल सम्पत्ति ५५% ले घटेर ५१.६ अर्ब अमेरिकी डलर कायम भएको छ।
अर्थशास्त्रीहरूका अनुसार यस्तो सुन बिक्रीले एकातिर बजारमा मुद्रा आपूर्ति बढाएर रूबललाई सहयोग गर्छ, अर्कोतिर युआन सञ्चितिमाथिको दबाब कम गर्छ र सञ्चितिको विविधीकरण पनि कायम रहन्छ।
