राज्य व्यवस्था समितिमा सभापति निर्विरोध, तीन समितिको बैठक आजै

काठमाडौं। आज संसद्का तीन स्थायी समितिहरूको बैठक बस्दैछ। ती समितिहरूमा राज्य व्यवस्था तथा सुशासन समिति, विधायन व्यवस्थापन समिति र सार्वजनिक नीति तथा प्रत्यायोजित विधायन समिति रहेका छन्।

राज्य व्यवस्था तथा सुशासन समितिले सभापतिको निर्वाचन प्रक्रिया अगाडि बढाउने एजेन्डा तय गरेको छ। यद्यपि, उक्त समितिको सभापतिमा सांसद ईश्वरी न्यौपाने निर्विरोध निर्वाचित भइसकेकी छन्। त्यस्तै, विधायन व्यवस्थापन समितिको बैठकमा ‘संघीय निजामति सेवा विधेयक, २०८०’ माथि दफावार छलफल हुने कार्यक्रम छ।

यसैगरी, सार्वजनिक नीति तथा प्रत्यायोजित विधायन समितिले समितिको छैटौं वार्षिक प्रतिवेदन (२०८१/८२) सम्बन्धमा छलफल गर्ने कार्यसूची तय गरेको छ।