नेपाल सरकारको मुख्यसचिवमा रक्षा मन्त्रालयका सचिव सुमनराज अर्याललाई नियुक्त
- Nov Mon, 2025
- in बिजिनेस प्रेस
नेपाल सरकारको मुख्यसचिवमा रक्षा मन्त्रालयका सचिव सुमनराज अर्याललाई नियुक्त गरिएको छ । प्रधानमन्त्री तथा मन्त्रिपरिषद् कार्यालयमा सोमबार बसेको मन्त्रिपरिषद् बैठकले एकनारायण अर्यालको अनिवार्य अवकाशपछि खाली भएको पदमा सुमनराज अर्याललाई मुख्यसचिवमा बढुवा गर्ने निर्णय गरेको हो ।हालका मुख्यसचिव एकनारायण अर्याल ५८ वर्षे उमेर हदका कारण मङ्गलबार रातिदेखि अनिवार्य अवकाशमा जान लागेका छन् । उनी करिब ५ महिनादेखि मुख्यसचिवको जिम्मेवारीमा थिए । वरीयतामा दोस्रो नम्बरका अर्याललाई बढुवा गरिनुमा पहिलो नम्बरका सचिवहरूको अवकाश वा राजीनामाले मार्ग प्रशस्त गरेको छ । राष्ट्रिय योजना आयोगका सचिव गोकर्णमणि दुवाडी ५ वर्षे पदावधि पूरा भएर अवकाशमा छन् भने भरतमणि सुवेदीले राजीनामा दिएका थिए ।सुमनराज अर्याल २०७७ माघ १९ गते सचिवमा बढुवा भएका थिए । तथ्यांक समूहबाट निजामती सेवामा प्रवेश गरेका अर्याल सहसचिव हुँदासम्म तथ्यांक विभागको महानिर्देशक थिए । सचिवमा बढुवा भएपछि प्रशासन सेवामा आएका उनी रक्षा मन्त्रालयमा कार्यरत थिए । अन्य सचिवहरूभन्दा ५ महिना सिनियर भएकाले उनको सम्भावना प्रबल थियो । मुख्यसचिव बनेपछि अर्याल २०८३ असार २६ गतेसम्म मात्र सेवामा रहनेछन्, त्यसपछि उनी पनि ५८ वर्षे उमेर हदका कारण अवकाशमा जानेछन् ।मुख्यसचिव पदका लागि १४ जना सचिवहरू आकांक्षी थिए, जसमध्ये चार जनाको प्रतिस्पर्धा मुख्य थियो । तर, वरीयता र मेरिटका आधारमा सुमनराज अर्याललाई प्राथमिकता दिइएको प्रधानमन्त्री निकट स्रोतले बताएको छ । “सरकार सरुवाबढुवाको विवादमा पर्न चाहँदैन, मेरिटमा अघि हुनेलाई नै बढुवा गरिन्छ,” एक उच्च अधिकारीले भने ।यो नियुक्तिले निजामती सेवाको नेतृत्वमा नयाँ गतिशीलता ल्याउने अपेक्षा गरिएको छ । मुख्यसचिवले सरकारका सबै सचिवीय निर्णयहरूको समन्वय गर्दै प्रधानमन्त्रीलाई सल्लाह दिने र नीति कार्यान्वयनमा मुख्य भूमिका खेल्छन् । अर्यालको नियुक्तिपछि निजामती सेवामा तथ्यांक र प्रशासनिक अनुभवको सन्तुलन कायम हुने विश्लेषकहरूको भनाइ छ ।
