साइबर अपराधमा दुई राजनीतिक नेता पक्राउ: एक रिहा, अर्को हिरासतमा

काठमाडौं। बुधबार एकै दिन दुई फरक राजनीतिक दलका नेताहरू साइबर अपराधको आरोपमा प्रहरीको फन्दामा परेका छन् । नेपाल कम्युनिस्ट पार्टी (एमाले) का केन्द्रीय सदस्य ऐन महर र राष्ट्रिय स्वतन्त्र पार्टी (रास्वपा) का केन्द्रीय सदस्य अरनिको पाँडे पक्राउ परेका हुन् । यसमध्ये महर बुधबार नै रिहा भएका छन् भने पाँडेलाई बिहीबार म्याद थपका लागि अदालतमा पेस गरिने भएको छ ।साइबर ब्युरोका प्रवक्ता प्रहरी वरिष्ठ उपरीक्षक (एसएसपी) दीपकराज अवस्थीका अनुसार, एक महिलाले सामाजिक सञ्जालमार्फत आफूलाई अपशब्द प्रयोग गरेको भन्दै पाँडेविरुद्ध जाहेरी दिएकी थिइन् । सोही आधारमा पक्राउ पुर्जी जारी भएपछि पाँडे आफैं बुधबार साइबर ब्युरोमा उपस्थित भएका थिए । उनी राष्ट्रिय योजना आयोगका पूर्वसदस्य पनि हुन् ।यसैगरी, ऐन महरलाई म्याद थपका लागि प्रहरीले जिल्ला सरकारी वकिल कार्यालय काठमाडौंमा उपस्थित गराउँदा प्रमुख रामहरि काफ्लेले हाजिर जमानीमा छाड्ने निर्णय गरेका थिए । महरकी पत्नी सनुजा श्रेष्ठलाई पनि प्रहरीले छाडेको छ । एक महिलाले महर र उनकी श्रीमतीविरुद्ध साइबर अपराधसम्बन्धी जाहेरी दर्ता गराएकी थिइन् । महर अनेरास्ववियुको विद्यार्थी राजनीतिबाट पार्टीको केन्द्रीय सदस्य बनेका नेता हुन् ।

यस घटनाले प्रहरी प्रशासनमा विभेदको आरोप लागेको छ । राज्यसमर्थित व्यक्ति भएका कारण केही घटनामा थुनामुक्त हुने तर अर्को व्यक्ति प्रहरी हिरासतमा रहने जस्ता समान प्रकृतिका घटनामा देखिएको यो विभेदले प्रहरीलाई नै विवादास्पद बनाएको छ । प्रहरीले नीयत खराब राखेर विपक्षी भएको आधारमा ढिला अदालतमा उपस्थित गराउने गरेको आरोप लागेको छ । विपक्षीहरूले प्रहरीको दुरुपयोगको शृंखला कहाँ पुगेर रोकिन्छ भन्न सकिने अवस्था नरहेको आरोप लगाएका छन् । यसले राजनीतिक पूर्वाग्रह र कानुनी समानताको प्रश्न उठाएको छ । थप अनुसन्धान जारी रहेको प्रहरीले जनाएको छ ।