नेपालले यूएईलाई १ रनले हरायो

काठमाडौं – नेपाली क्रिकेट टोलीले ओमानको अल अमेरत क्रिकेट ग्राउण्डमा यूएईविरुद्ध टी-२० अन्तर्राष्ट्रिय क्रिकेटमा ऐतिहासिक जित हात पारेको छ। टी-२० विश्वकप एसिया एण्ड इएपी छनोटको सुपर सिक्स चरणमा नेपालले यूएईलाई रोमाञ्चक १ रनले पराजित गर्दै ओमानमा यूएईविरुद्धको लगातार तीन हारको शृंखला तोडेको हो। यो जितसँगै नेपालले सुपर सिक्समा ४ अंक जोडेको छ र अर्को वर्ष भारत र श्रीलंकामा हुने टी-२० विश्वकपका लागि महत्वपूर्ण खुड्किलो पार गरेको छ।कप्तान रोहित कुमार पौडेलले टस जितेर पहिले ब्याटिङ रोजेपछि नेपालले २० ओभरमा ६ विकेट गुमाएर १४० रन बनायो। ओपनर आसिफ शेखले ४७ बलमा ५१ रनको अर्धशतकीय इनिङ्स खेले।

यूएईका ६ बलरले समान १-१ विकेट लिएर नेपालको स्कोरलाई सीमित पारे।१४१ रनको लक्ष्य पछ्याएको यूएईले २० ओभरमा ९ विकेट गुमाएर १३९ रन मात्र जोड्न सक्यो। यूएईका अलिशान सराफुले ४० बलमा ३ चौका र ५ छक्कासहित ५८ रन बनाएर इनिङ्स सम्हाले पनि अन्तिम ओभरमा नेपालको बलिङ र फिल्डिङले खेल उल्टायो। दीपेन्द्र सिंह ऐरीले अन्तिम ओभरमा १० रन डिफेन्ड गर्दै १ विकेट लिए र दुई रनआउट गरेर नेपाललाई जित दिलाए।खेलको क्लाइमेक्स अन्तिम ओभरमा देखियो। यूएईलाई जितका लागि १० रन चाहिएको थियो। पहिलो बलमा सिंगल लिएपछि ध्रुव पारासेरले तेस्रो बलमा छक्का प्रहार गरे। तर चौथो बलमा दीपेन्द्रले पारासेरलाई सन्दीप जोराको क्याचमा आउट गरे। पाँचौं बलमा हैदर अली रनआउट भए (शर्ट रनका कारण १ रन पनि नपाइ) र अन्तिम बलमा जाहिद अली पनि रनआउट भए। यसरी यूएई १ रनले पराजित भयो।ब्याटिङमा १ रनमै आउट भए पनि दीपेन्द्रले बलिङ र फिल्डिङमा 'टाइगर' उपनामलाई न्याय गरे। उनले ४ ओभरमा २२ रन खर्चेर ३ विकेट लिए (जोनाथन फिगी, अलिशान सराफु र ध्रुव पारासेर) र एक रनआउट (राहुल चोपरा) गरे। यसअघि यूएई ८३-१ को मजबुत अवस्थामा थियो, तर दीपेन्द्रले १२औं ओभरमा फिगी र १४औं ओभरमा सराफुको विकेट लिएर खेललाई नेपालतिर ढल्काए।कप्तान रोहित पौडेलले पोस्ट म्याचमा भने, "१४० रन बोर्डमा पर्याप्त थिएन। हामीले १६०-१७० रन बनाउनुपर्ने थियो। तर उनीहरूले अन्तिम १० ओभरमा राम्रो बलिङ गरे। क्रेडिट उनीहरूलाई जान्छ। तर अन्तिममा हामी विनिङ साइडमा रह्यौं। विश्वास सधैं थियो। जब हामीले अलिशानको विकेट लियौं, हामीलाई थाहा थियो अब खेलमा फर्कन सकिन्छ।"दीपेन्द्रको प्रशंसा गर्दै रोहितले थपे, "यदि तपाईंसँग दीपेन्द्र सिंह ऐरी छ भने अरु केही चाहिँदैन।

दीपेन्द्रले रन नबनाए पनि बलिङ र रनआउटबाट योगदान गर्छन्। उनी फुल प्याकेज हुन्।"अन्य नेपाली बलरहरूमा गुल्सन झाले हर्सित कोशिकको विकेट लिए भने सन्दीप लामिछानेले १६औं ओभरमा बसिल हमिदलाई बोल्ड गरे। सोमपाल कामीले यूएई कप्तान मुहम्मद वासिमलाई १ रनमै आउट गरेका थिए।नेपाल र यूएईबीचको यो खेललाई एसोसिएट क्रिकेटमा 'एल क्लासिको' भनिन्छ। दुवै टिमका एक-एक खेलाडीले अर्धशतक प्रहार गरे पनि फिनिसिङ रोमाञ्चक रह्यो। यूएईका कप्तान वासिमले एक रन शर्ट हुँदा घाटा लागेको बताए र आगामी खेलमा बलियो भएर आउने प्रतिबद्धता जनाए।यो जितले नेपाल घरेलु टोली ओमानसँग समान ४ अंक जोडेको छ। सुपर सिक्समा नेपालको अर्को चुनौती कडा हुनेछ, तर दीपेन्द्रजस्ता खेलाडीले टोलीलाई बलियो बनाएका छन्। नेपाली क्रिकेटप्रेमीहरू यस जितले उत्साहित छन्।