हुम्लामा हवाई टिकटमा भागबन्डा : बिरामी २, कर्मचारी ३, अनलाइन ३, गाउँपालिका १–१ सिट मात्र !
- Nov Sun, 2025
- in बिजिनेस प्रेस
हुम्ला। हुम्लाको सदरमुकाम सिमकोटबाट नेपालगन्जसम्मको हवाई टिकट अब भागबन्डामा बाँडिने भएको छ । १८ सिट क्षमताको जहाजमा यात्रुको अत्यधिक चाप र टिकटका लागि दिनदिनै झैझगडा भएपछि जिल्ला प्रशासन कार्यालयले एक साताअघि बसेको सर्वदलीय बैठकबाट यस्तो निर्णय गरेको हो ।प्रमुख जिल्ला अधिकारीको अध्यक्षतामा बसेको बैठकले अबदेखि प्रत्येक उडानमा निम्नानुसार सिट भागबन्डा गर्ने निर्णय गरेको छः
- बिरामी तथा आपत्कालीन यात्रु : २ सिट
- सरकारी कर्मचारी (जिल्ला आउजाउ गर्ने) : ३ सिट
- अनलाइन बुकिङ : ३ सिट
- सिमकोट गाउँपालिका–६ का बासिन्दा : १ सिट
- सिमकोट गाउँपालिका–७ का बासिन्दा : १ सिट
- बाँकी ८ सिट : पहिले जस्तै लाइनमा बस्ने यात्रुलाई पहिलो प्राथमिकतामा
दुई साता अघि टिकट नपाएपछि आक्रोशित जेनजी युवाले समिट, सीता र ताराका टिकट काउन्टरमा तालाबन्दी गरेका थिए । त्यसअघि एक दिन त गोलाप्रथा नै गरेर यात्रु छानिएको थियो । मानसरोवर–कैलाश यात्राको सिजनमा दैनिक ५ वटासम्म उडान हुने सिमकोटमा अहिले जहाजको सङ्ख्या घटेपछि यात्रु मारमा परेका छन् ।
स्थानीय व्यवसायी विजय लामा भन्छन्, “एक वर्षअघि सिमकोट सुर्खेतसँग सडक सञ्जालमा जोडियो, तर कच्ची सडक र १८ घण्टाको जोखिमपूर्ण यात्राका कारण कोही पनि गाडी चढ्न मान्दैनन् । त्यसैले सबैको विकल्प जहाज मात्र हो ।”
सुर्खेत–सिमकोटको हवाई दूरी जम्मा २९४ किलोमिटर छ, तर सडकबाट जानुपर्यो भने १८ घण्टा लाग्छ र बर्खामा त महिनौंसम्म बाटो बन्द हुन्छ । यही कारण हुम्लावासीले हवाई टिकटलाई ‘ज्यानको टिकट’ भन्न थालेका छन् ।
अब प्रश्न उठेको छ – के यो भागबन्डा दीर्घकालीन समाधान हो ? कि फेरि कुनै दिन यात्रुहरूले विमानस्थलमै धर्ना दिनुपर्ने हो ? हुम्लावासीले सरकारसँग स्पष्ट माग गरेका छन् : “या त नियमित उडान बढाऊ, या त सडक बनाऊ ।”
