नाइजरियामा इस्लामिक आतङ्कवादी समूहहरूमाथि कारबाही गर्न अमेरिकी सेनालाई तयारी गर्न आदेश

अमेरिकी राष्ट्रपति डोनाल्ड ट्रम्पले नाइजरियामा इस्लामिक आतङ्कवादी समूहहरूमाथि कारबाही गर्न अमेरिकी सेनालाई तयारी गर्न आदेश दिएका छन्। उनले नाइजरियाली सरकारले इसाईहरूको सुरक्षा गर्न असफल भएको आरोप लगाएका छन्। ट्रम्पले कुन घटनाको बारेमा कुरा गरेका हुन् भन्ने स्पष्ट नभए पनि पछिल्ला हप्ताहरूमा केही दक्षिणपन्थी अमेरिकी वृत्तमा नाइजरियामा इसाईहरूमाथि "हत्या र नरसंहार" भइरहेको दाबीहरू फैलिइरहेका छन्।

तर हिंसाको निगरानी गर्ने समूहहरूले भने नाइजरियामा इसाईहरूभन्दा मुसलमानहरू बढी मारिएका छन् भन्ने प्रमाण नभएको बताएका छन्। देश करिब आधा-आधा इसाई र मुसलमान जनसंख्यामा बाँडिएको छ।नाइजरियाका राष्ट्रपति बोला टिनुबुका सल्लाहकार ड्यानियल ब्वालाले बीबीसीसँग कुरा गर्दै भने कि नाइजरिया अमेरिकी सहयोगको स्वागत गर्न तयार छ, तर त्यो सहयोग सँगै गरेर गर्नुपर्ने हो। उनले नाइजरिया एउटा सार्वभौम देश भएको स्मरण गराए। ब्वालाले आतंकवादीहरूले कुनै विशेष धर्मका मानिसहरूलाई मात्र लक्ष्य नबनाएको र सबै धर्म तथा नास्तिकहरू समेतको हत्या गरेको बताए।राष्ट्रपति टिनुबुले पनि देशमा धार्मिक सहिष्णुता रहेको भन्दै सुरक्षा चुनौतीहरूले सबै धर्म र क्षेत्रका मानिसहरूलाई असर गरिरहेको बताए।शनिबार ट्रम्पले सामाजिक सञ्जालमा लेखेका थिए कि उनले अमेरिकी “Department of War” लाई सम्भावित कारबाहीको तयारी गर्न निर्देशन दिएका छन्। आइतबार उनले पुनः भने कि अमेरिका नाइजरियामा सेना पठाउन वा हवाई आक्रमण गर्न सक्छ, ताकि “इसाईहरूको हत्या रोक्न सकियोस्।”ट्रम्पले लेखेका थिए, “तिनीहरू नाइजरियामा रेकर्ड संख्यामा इसाईहरू मारिरहेका छन्। हामी त्यस्तो हुन दिनेछैनौं।” उनले चेतावनी दिएका थिए कि यदि नाइजरियाली सरकारले कदम चालेन भने “गन्स-ए-ब्लेजिङ” शैलीमा अमेरिका हमला गर्न सक्छ र नाइजरियालाई दिइने सबै सहायता रोक्नेछ।अमेरिकी रक्षामन्त्री पिट हेगसेथले ट्रम्पको पोस्टमा जवाफ दिँदै लेखे, “हुजुर, विभाग तयारीमा छ। यदि नाइजरियाली सरकारले इसाईहरूलाई जोगाएन भने हामी आतंकवादीहरूलाई नष्ट गर्नेछौं।”यस धम्कीपछि नाइजरियाभर त्रास र बहस फैलिएको छ। धेरैले सरकारलाई आतङ्कवादविरुद्धको कारबाही बलियो बनाउन आग्रह गरेका छन् ताकि विदेशी सेना नआओस्।

ट्रम्पले नाइजरियालाई “Country of Particular Concern” घोषणा गरेका छन्, दाबी गर्दै कि देशमा इसाईहरूको अस्तित्वमाथि संकट छ। तर उनले त्यसको प्रमाण प्रस्तुत गरेका छैनन्। अमेरिकी विदेश मन्त्रालयको यो पदवी त्यस्ता देशहरूलाई दिइन्छ जहाँ “धार्मिक स्वतन्त्रताको गम्भीर उल्लंघन” हुन्छ।टिनुबुले भने अमेरिकासँग सहकार्य गर्ने प्रतिबद्धता जनाउँदै नाइजरियालाई धार्मिक असहिष्णु देशको रूपमा चित्रण गर्नु गलत भएको प्रतिक्रिया दिएका छन्।नाइजरियामा बोको हराम र इस्लामिक स्टेट वेस्ट अफ्रिका प्रोभिन्स जस्ता आतङ्कवादी समूहहरूले दशकौँदेखि हिंसा मच्चाइरहेका छन्, जसमा हजारौँ मानिस मारिएका छन् — तर अधिकांश मुसलमानहरू हुन्। केन्द्रीय नाइजरियामा मुसलमान गोठाला र इसाई किसानबीच चरन र पानीको पहुँचका लागि द्वन्द्व भइरहन्छ, जसमा दुबै पक्षबाट अत्याचार भएका छन्। मानवअधिकार समूहहरूले भने यसमा कुनै धर्म विशेषका मानिसहरूलाई मात्र निशाना बनाइएको छैन भनेका छन्।