युद्धबाट पछि हट्ने विकल्पमा अमेरिका, ट्रम्पको ‘एकपक्षीय विजय घोषणा’बारे विश्लेषण हुँदै

अमेरिकी गुप्तचर निकायहरूले दुई महिनादेखि जारी युद्धमा यदि डोनाल्ड ट्रम्प ले एकपक्षीय रूपमा विजय घोषणा गरे इरानले कस्तो प्रतिक्रिया जनाउन सक्छ भन्ने विषयमा अध्ययन गरिरहेका छन्। हजारौंको ज्यान गएको र ह्वाइट हाउसका लागि राजनीतिक रूपमा बोझ बन्दै गएको यस युद्धबाट पछि हट्ने सम्भावनालाई ध्यानमा राख्दै यस्तो विश्लेषण भइरहेको जनाइएको छ।स्रोतहरूका अनुसार यो अध्ययन वरिष्ठ प्रशासनिक अधिकारीहरूको निर्देशनमा भइरहेको हो, जसको उद्देश्य सम्भावित निर्णयका प्रभावहरू बुझ्नु हो। विशेषगरी आगामी मध्यावधि निर्वाचनमा रिपब्लिकन पार्टीलाई ठूलो नोक्सानी हुन सक्ने चिन्ताका बीच यस्तो मूल्यांकन अघि बढाइएको छ।यदि ट्रम्पले विजय घोषणा गर्दै अमेरिकी सेना फिर्ता गरे भने इरान ले त्यसलाई आफ्नो जितको रूपमा लिन सक्ने प्रारम्भिक आकलन गरिएको छ। तर, यदि अमेरिका विजय घोषणा गर्दै क्षेत्रमै बलियो सैन्य उपस्थिति कायम राख्छ भने इरानले त्यसलाई वार्ताको रणनीति मात्र ठान्ने सम्भावना रहेको बताइएको छ।ह्वाइट हाउसले भने अझै पनि वार्तालाई प्राथमिकता दिइरहेको जनाएको छ। प्रवक्ता अन्ना केलीका अनुसार अमेरिका हतारमा कुनै खराब सम्झौता गर्न तयार छैन र राष्ट्रिय सुरक्षालाई पहिलो प्राथमिकतामा राख्नेछ।

यसबीच जनमत सर्वेक्षणहरूले देखाएअनुसार युद्धप्रति अमेरिकी जनताको समर्थन निकै कमजोर छ। पछिल्लो सर्वेक्षणमा केवल २६ प्रतिशतले मात्र यो युद्ध उचित भएको बताएका छन् भने २५ प्रतिशतले मात्र यसले देशलाई सुरक्षित बनाएको विश्वास गरेका छन्।युद्धका कारण होर्मुज जलडमरूमध्य मा अवरोध उत्पन्न हुँदा विश्वभर ऊर्जा मूल्य बढेको छ। विश्वको करिब २० प्रतिशत कच्चा तेल ओसारपसार हुने यस जलमार्गमा इरानले जहाजमाथि आक्रमण र माइन बिछ्याएर नियन्त्रण जमाउने प्रयास गरेको छ, जसले अमेरिकामाथि थप दबाब सिर्जना गरेको छ।हालसम्म कूटनीतिक प्रयास सफल हुन सकेका छैनन्। ट्रम्पले हालै आफ्ना विशेष दूत स्टिभ विटकफ र ज्वाइँ जारेड कुशनरको पाकिस्तान भ्रमण रद्द गर्दै इरानले वार्ता गर्न चाहे आफैं सम्पर्क गर्नुपर्ने बताएका थिए।सैन्य विकल्पहरू अझै खुला राखिएको भए पनि पूर्ण स्थलगत आक्रमणजस्ता ठूला कदम चाल्ने सम्भावना घट्दै गएको बताइएको छ। यता, युद्धविरामको अवधिमा इरानले आफ्ना हतियार र सैन्य सामग्री पुनः व्यवस्थित गरेकोले फेरि पूर्ण युद्ध सुरु भए लागत अझ बढ्ने विश्लेषण गरिएको छ।समग्रमा, अमेरिका अहिले कूटनीति र सैन्य विकल्पबीच सन्तुलन खोजिरहेको अवस्थामा देखिन्छ भने इरानसँगको तनाव अझै समाधानतर्फ उन्मुख हुन सकेको छैन।