इरानले अमेरिकी मिसाइल प्रतिरक्षा रडारलाई निशाना बनाएको संकेत

मध्यपूर्व क्षेत्रमा जारी तनावबीच इरानले अमेरिकी मिसाइल प्रतिरक्षा प्रणालीसँग सम्बन्धित महत्वपूर्ण रडारलाई निशाना बनाएको संकेतहरू सार्वजनिक भएका छन्। हालै सार्वजनिक भएका उपग्रह तस्बिर तथा विभिन्न अन्तर्राष्ट्रिय सञ्चारमाध्यमका रिपोर्टहरूले कतरस्थित अमेरिकी सैन्य अड्डामा रहेको अत्याधुनिक मिसाइल चेतावनी रडारमा क्षति पुगेको देखाएको बताएका छन्। 

रिपोर्टका अनुसार कतरको अल–उदेद एयर बेस नजिकै रहेको अमेरिकी AN/FPS-132 प्रारम्भिक चेतावनी रडार प्रणाली इरानको मिसाइल वा ड्रोन आक्रमणको निशानामा परेको हो। उक्त रडार प्रणालीलाई मध्यपूर्व क्षेत्रमा अमेरिकी सेनाको सबैभन्दा महत्वपूर्ण निगरानी संरचनामध्ये एक मानिन्छ। यसको मुख्य काम टाढाबाट आउने ब्यालिस्टिक मिसाइलहरू पहिचान गरेर समयमै चेतावनी दिनु हो। विशेषज्ञहरूका अनुसार यो रडार प्रणाली करिब ५ हजार किलोमिटर टाढासम्म मिसाइलको गतिविधि ट्र्याक गर्न सक्षम छ। यसको अनुमानित लागत करिब १.१ अर्ब अमेरिकी डलर रहेको बताइएको छ। यस प्रणालीबाट अमेरिका र उसका सहयोगी राष्ट्रहरूले मध्यपूर्व क्षेत्रमा सम्भावित मिसाइल आक्रमणको प्रारम्भिक सूचना प्राप्त गर्दै आएका थिए। उपग्रह तस्बिरहरूमा रडारको वरिपरि क्षति पुगेको संकेत देखिएको तथा आगो निभाउने गतिविधि देखिएको बताइएको छ। केही विश्लेषकहरूले इरानले सस्तो तर प्रभावकारी ड्रोन प्रयोग गरेर यो हमला गरेको हुनसक्ने बताएका छन्। यस्तो ड्रोनले उच्च मूल्यका रक्षा प्रणालीलाई पनि चुनौती दिन सक्ने देखिएको उनीहरूको भनाइ छ। 

इरानले यसलाई अमेरिका र उसका सहयोगीहरूले इरानमाथि गरेका सैन्य आक्रमणहरूको प्रतिउत्तरको रूपमा गरेको दाबी गरेको बताइएको छ। पछिल्ला हप्ताहरूमा अमेरिका र इजरायलले इरानका विभिन्न सैन्य संरचनामाथि आक्रमण गरेपछि क्षेत्रीय तनाव तीव्र बनेको छ। त्यसपछि इरानले मध्यपूर्वमा रहेका अमेरिकी सैन्य अड्डा तथा सहयोगी राष्ट्रहरूलाई लक्षित गर्दै मिसाइल र ड्रोन आक्रमण सुरु गरेको बताइन्छ।सैन्य विश्लेषकहरूका अनुसार यदि यस्तो महत्वपूर्ण रडार प्रणाली दीर्घकालीन रूपमा क्षतिग्रस्त भएको पुष्टि भएमा मध्यपूर्व क्षेत्रमा अमेरिकी मिसाइल निगरानी क्षमतामा अस्थायी कमजोरी आउन सक्छ। यद्यपि अमेरिकासँग उपग्रह, अन्य रडार तथा बहुस्तरीय सुरक्षा प्रणाली भएकाले पूर्ण रूपमा सुरक्षा प्रणाली कमजोर हुने सम्भावना भने कम रहेको बताइन्छ। यस घटनाले मध्यपूर्वको सुरक्षा अवस्था अझ संवेदनशील बनेको छ। इरान, अमेरिका र उनका सहयोगी राष्ट्रहरूबीचको तनाव बढ्दै जाँदा क्षेत्रीय युद्धको जोखिम पनि बढ्न सक्ने चिन्ता अन्तर्राष्ट्रिय विश्लेषकहरूले व्यक्त गरेका छन्।