अर्जेन्टिनामा आँसु, स्पेनलाई हाँसो: अतिरिक्त समयमा टोर्रेसको गोलले विश्वकप जित्यो

फिफा विश्वकप २०२६ को फाइनलमा स्पेनले अर्जेन्टिनालाई १–० ले पराजित गर्दै दोस्रो पटक विश्व च्याम्पियन बन्न सफल भएको छ। निर्धारित ९० मिनेटमा दुवै टोलीबाट गोल हुन नसकेपछि खेल अतिरिक्त समयमा पुगेको थियो। खेलको १०६औँ मिनेटमा फेरान टोर्रेसले निर्णायक गोल गर्दै स्पेनलाई ऐतिहासिक जित दिलाए।खेलभर स्पेनले बलमाथि नियन्त्रण कायम राख्दै लगातार आक्रमण गर्यो। अर्जेन्टिनाले रक्षात्मक रणनीति अपनाए पनि प्रभावकारी आक्रमण गर्न सकेन। पूरा १२० मिनेटमा अर्जेन्टिनाले लक्ष्यतर्फ एउटा पनि प्रहार गर्न नसक्दा टोलीको प्रदर्शन निराशाजनक रह्यो।

विश्वभरका लाखौँ समर्थकको ध्यान तानेको यो फाइनल अर्जेन्टिनाका कप्तान लियोनेल मेसीका लागि विशेष थियो। सम्भावित अन्तिम विश्वकप खेलमा दोस्रो उपाधि जित्ने उनको सपना भने पूरा हुन सकेन। खेल सकिएपछि मेसी भावुक बनेका दृश्यले समर्थकलाई पनि भावुक बनायो।स्पेनका प्रशिक्षकले दोस्रो हाफमा गरेका खेलाडी परिवर्तन निर्णायक सावित भए। बेन्चबाट मैदान प्रवेश गरेका खेलाडीहरूले आक्रमणलाई थप धार दिए। अन्ततः निको विलियम्सले सिर्जना गरेको अवसरलाई फेरान टोर्रेसले शक्तिशाली प्रहारमार्फत गोलमा परिणत गर्दै स्पेनलाई अग्रता दिलाए। त्यसपछि अर्जेन्टिनाले बराबरीको प्रयास गरे पनि स्पेनको रक्षापंक्ति मजबुत रह्यो।

खेलको अन्तिमतिर अर्जेन्टिनाका एन्जो फर्नान्डेज रातो कार्ड पाएपछि टोली झन् दबाबमा परेको थियो। त्यसको फाइदा उठाउँदै स्पेनले अन्तिमसम्म आफ्नो अग्रता जोगायो र विश्व फुटबलको सर्वोच्च उपाधि आफ्नो नाम गर्यो।स्पेनका खेलाडीहरूले जितपछि मैदानमै उत्सव मनाए भने समर्थकहरू खुसीले रमाए। यो उपाधि सन् २०१० पछि स्पेनको दोस्रो विश्वकप सफलता हो। अर्कोतर्फ, अर्जेन्टिनाका समर्थकका लागि यो हार निकै पीडादायी बन्यो। लगातार संघर्ष गरे पनि टोलीले उपाधि जोगाउन सकेन।यस फाइनलले विश्व फुटबलमा नयाँ इतिहास लेखेको छ। स्पेनले उत्कृष्ट टोलीगत खेल, संयम र प्रभावकारी रणनीतिका कारण उपाधि जित्दा अर्जेन्टिनाको गौरवपूर्ण यात्राको अन्त दुःखद हारसँग भएको छ। मेसीका लागि यो विश्वकपको अन्तिम अध्याय हुन सक्ने चर्चा भइरहेका बेला उनको विदाइ उपाधिसहित हुन नसक्दा फुटबल समर्थकमाझ मिश्रित भावना देखिएको छ।