ओकिनावा नजिक चिनियाँ र जापानी लडाकु विमानबीच तनाव

चिनियाँ लडाकु विमानहरूले शनिबार जापानका ओकिनावा नजिकका अन्तर्राष्ट्रिय जल क्षेत्रमा जापानी विमानतर्फ फायर–कन्ट्रोल राडार तेर्स्याएका दुई छुट्टाछुट्टै घटनाबारे जापानका रक्षा मन्त्री शिन्जिरो कोइजुमीले “खतरनाक” भन्दै कडा प्रतिक्रिया जनाएका छन्। उनका अनुसार, यी राडार प्रयोग “सुरक्षित उडानका लागि आवश्यक सीमाभन्दा धेरै नै पर” थिए, र जापानले यसबारे चीनसँग औपचारिक विरोध जनाएको छ।फायर–कन्ट्रोल राडार लक गर्नु कुनै पनि सैन्य विमानको सबैभन्दा आक्रामक संकेत मानिन्छ, किनकि यसले प्रत्यक्ष आक्रमणको सम्भावना देखाउँछ र लक्ष्य बनाइएका विमानलाई तुरुन्तै बचाउका उपाय अपनाउन बाध्य पार्छ।

दुवै देशले दाबी गर्ने क्षेत्र नजिक भएका यी घटना पछिल्ला वर्षहरूमा भएका सबैभन्दा गम्भीर सैन्य भिडन्तमध्ये एक मानिएको छ, र यसले जापान–चीनबीचको तनाव झनै बढ्ने अनुमान गरिएको छ। हालै जापानकी प्रधानमन्त्री साने ताकाइचीले, यदि ताइवानविरुद्धको कुनै चीनी सैन्य कदमले जापानको सुरक्षालाई समेत असर पुर्‍यायो भने, जापानले जवाफी कदम चाल्न सक्ने चेतावनी दिएकी थिइन।चीनले दाबी गरेका तर लोकतान्त्रिक ढंगले सञ्चालित ताइवान जापानको पश्चिमी द्वीप योनागुनीबाट करिब ११० किलोमिटर टाढा मात्र पर्छ।शनिबारका घटनामा संलग्न चिनियाँ J-15 लडाकु विमानहरू चीनको लिओनिङ विमानवाहक जलयानबाट उडान भरिएका थिए, जुन ओकिनावा दक्षिणतिर तीनवटा मिसाइल डेस्ट्रोयरसहित सक्रिय रूपमा परिक्रमा गरिरहेको जापानले जनाएको छ।यसअघि पनि दुवै देशका सैन्य जहाज र विमानबीच नजिकबाट भएका तनावपूर्ण घटना देखिँदै आएका छन्।