जापानको टोयोआके शहरमा स्मार्टफोन प्रयोग घटाउन विशेष पहल

जापानको आइची प्रान्तमा रहेको टोयोआके नगरपालिकाले आफ्ना ६९ हजार बासिन्दालाई दैनिक दुई घण्टाभन्दा बढी स्मार्टफोन प्रयोग नगर्न आग्रह गर्ने एउटानयाँ प्रस्ताव ल्याएको छ। जापानमा यस्तो खालको यो पहिलो प्रयास हो र यसको उद्देश्य नागरिकहरूलाई स्मार्टफोनको अत्यधिक प्रयोगबाट हुन सक्ने समस्याहरूबारे सचेत गराउनु रहेको छ।नगर प्रमुख मसाफुमी कोकीले ल्याएको यो प्रस्ताव हाल नगर सभामा छलफल भइरहेको छ र आगामी अक्टोबर महिनामा यसलाई पारित गर्ने तयारी छ। तर, यो नियम बाध्यकारी भने हुनेछैन, किनकि यसको मुख्य उद्देश्य मानिसहरूमा चेतना फैलाउनु हो।मेयर कोकीले भने, “यो दुई घण्टाको सीमा एउटा सल्लाह मात्र हो। यसको लक्ष्य नागरिकहरूलाई सचेत गराउँदै परिवारभित्र मोबाइलको प्रयोगबारे खुल्ला छलफल गर्ने वातावरण बनाउनु हो।”

यो प्रस्तावले स्मार्टफोनको गैर-मनोरञ्जनात्मक प्रयोगलाई भने यो सीमामा गणना नगर्ने बताएको छ। जस्तै, पढाइ, काम, अनलाइन कक्षा, व्यायाम वा ई-स्पोर्ट्स प्रतियोगिताको तयारीका लागि गरिएको प्रयोगलाई यसमा समावेश गरिने छैन।

मेयर कोकीले स्मार्टफोनलाई आजको जीवनमा "अत्यावश्यक र उपयोगी" माने पनि यसले धेरै समस्या निम्त्याएको स्वीकार गरेका छन्। उनले केही विद्यार्थीहरू मोबाइलबिना घरबाट निस्कन पनि मान्दैनन् र स्कुल जान छोडेका छन् भने वयस्कहरू पनि फोन चलाउने क्रममा आफ्नो निद्रा र परिवारसँगको समय खेर फालिरहेका छन् भन्ने चिन्ता व्यक्त गरेका छन्।यदि यो प्रस्ताव पारित भए पनि, यसलाई पालना नगर्नेलाई कुनै जरिवाना वा कानुनी कारबाही हुने छैन। यसले जापानको यो सानो शहरमा प्रविधि र मानव स्वास्थ्यबीच सन्तुलन कायम गर्ने एउटा फरक र रोचक प्रयासको रूपमा चर्चा पाइरहेको छ।