अरब सागरमा तैनाथ अमेरिकी विमानवाहक जहाज यूएसएस अब्राहम लिंकन नजिक आक्रामक रूपमा उडेको इरानी ड्रोनलाई अमेरिकी सेनाले खसालेको छ । अमेरिकी रक्षा अधिकारीहरूका अनुसार अन्तर्राष्ट्रिय जलक्षेत्रमा चेतावनी दिँदा पनि ड्रोन नहटेपछि एफ–३५ लडाकु विमानमार्फत उक्त ड्रोन खसालिएको हो । घटनालाई आत्मरक्षाका लागि गरिएको कारबाहीका रूपमा अमेरिकी पक्षले व्याख्या गरेको छ ।ड्रोन खसालिएको केही घण्टामै होर्मुज जलडमरूमध्यमा अर्को तनावपूर्ण घटना देखिएको छ । इरानी रिभोल्युसनरी गार्ड्सका दुई गनबोटले अमेरिकी झण्डा बोकेको एक तेल ट्यांकरलाई घेराबन्दी गर्दै कब्जा गर्ने धम्की दिएका थिए । तर, अमेरिकी नौसैनिक विनाशक जहाज समयमै घटनास्थलमा पुगेपछि अवस्था नियन्त्रणमा आएको र ट्यांकर सुरक्षित रहेको जनाइएको छ । उक्त जलडमरूमध्य विश्वको महत्वपूर्ण तेल ढुवानी मार्ग भएकाले त्यहाँको कुनै पनि तनावले अन्तर्राष्ट्रिय बजारमा प्रभाव पार्ने चिन्ता बढेको छ ।
यी दुबै घटना अमेरिका र इरानबीच कूटनीतिक वार्ता हुने तयारी भइरहेका बेला भएका हुन् । वार्ता तय भएको केही दिनअघि नै सैन्य स्तरमा तनाव बढ्नुले कूटनीतिक प्रयासहरू प्रभावित हुने संकेत देखिएको छ । अमेरिकी पक्ष वार्ता तय भएअनुसार अघि बढ्न चाहिरहेको भए पनि इरानले वार्तास्थल परिवर्तन गर्नुपर्ने र एजेन्डा सीमित गर्नुपर्ने माग राखेपछि वार्ता अन्योलमा परेको बताइएको छ ।यसैबीच अमेरिकाले मध्यपूर्व क्षेत्रमा थप सैन्य शक्ति परिचालन गरेको घोषणा गरेको छ । अमेरिकी रक्षा मन्त्रालयका अनुसार क्षेत्रीय सुरक्षा सुनिश्चित गर्न र आफ्ना हित तथा सहयोगी राष्ट्रहरूको रक्षा गर्न थप सैन्य उपस्थिति बढाइएको हो । तर, इरानले भने यस कदमलाई उक्साहटपूर्ण भन्दै आलोचना गरेको छ ।विश्लेषकहरूका अनुसार पछिल्ला घटनाक्रमले अमेरिका–इरान सम्बन्ध झन् तनावपूर्ण बन्दै गएको देखाउँछ । कूटनीतिक संवाद सुरु हुनुअघि नै सैन्य टकरावका संकेत देखिनुले वार्ताको भविष्य अनिश्चित बन्दै गएको छ । क्षेत्रीय स्थायित्वका लागि दुवै पक्ष संयमित हुनुपर्ने अन्तर्राष्ट्रिय समुदायको आह्वान बढ्दै गएको छ ।
