अमेरिकामा भारतीय नागरिक दोषी, संवेदनशील विमान उपकरण अवैध निर्यात प्रयासमा सजाय

अमेरिकाले एक भारतीय नागरिकलाई संवेदनशील विमानजन्य उपकरण र प्रविधि गैरकानुनी रूपमा रूस पुर्‍याउने योजनामा संलग्न रहेको आरोपमा ३० महिनाको जेल सजाय सुनाएको छ। दिल्लीका ५८ वर्षीय संजय कौशिकले अमेरिकाको एक्सपोर्ट कन्ट्रोल नियम उल्लंघन गर्दै डुअल–युज (नागरिक तथा सैन्य दुवै प्रयोजन) उपकरण झूटो कागजपत्रमार्फत निर्यात गर्न खोजेको अमेरिकी न्याय विभागले जनाएको छ।

अदालतका अनुसार कौशिक र उनका साथीसँग २०२३ को सेप्टेम्बरमा ओरेगनस्थित कम्पनीबाट नेभिगेसन र फ्लाइट कन्ट्रोल डेटा प्रदान गर्ने एटिट्युड एन्ड हेडिङ रिफरेन्स सिस्टम (AHRS) खरिद गरी भारतमार्फत रूस पठाउने योजना थियो। यस्ता उपकरण निर्यात गर्न अमेरिकाबाट विशेष अनुमति चाहिने भएकाले कौशिकले आफ्नै भारतीय कम्पनीलाई अन्तिम खरिदकर्ता भनेर झूटो विवरण दिएको थियो। अमेरिकी अधिकारीहरूले यो कुनै क्षणिक गल्ती नभई नाफा कमाउने उद्देश्यले बनाइएको “योजना बद्ध र गणितीय” गतिविधि भएको बताएका छन्। फ्लोरिडामा २०२४ अक्टोबरमा पक्राउ परेका कौशिकले २०२५ मा दोष स्वीकृत गरेपछि अदालतले उनलाई ३० महिनाको कैद र त्यसपछिका ३६ महिनाको निगरानीको सजाय सुनाएको हो, साथै अमेरिकी पक्षले राष्ट्रिय सुरक्षामा खतरा पुर्‍याउने यस्तो अवैध व्यापार सह्य नहुने चेतावनी पनि दिएको छ।