रवि लामिछानेको प्रतिक्रिया: न्यायको लडाइँ बाँकी छ,सबैको हिसाब हुन्छ
- Dec Fri, 2025
- in बिजिनेस प्रेस
राष्ट्रिय स्वतन्त्र पार्टी (रास्वपा) का सभापति रवि लामिछाने शुक्रबार (पुस ४, २०८२) रुपन्देही जिल्ला अदालतको कागजी प्रक्रिया पूरा गरेपछि धरौटीमा थुनामुक्त भएका छन्। उच्च अदालत तुलसीपुरको बुटवल इजलासले बिहीबार (पुस ३) २ करोड ६८ लाख रुपैयाँ धरौटीमा रिहा गर्न आदेश दिएपछि उनी ललितपुरको नख्खु कारागारबाट भैरहवा लगिएका थिए।भैरहवास्थित जिल्ला कारागार परिसरबाट रिहा भएपछि लामिछानेले समर्थकहरूलाई सम्बोधन गर्दै भने, "ममाथि भएको अन्याय देशमाथि भएको अन्यायको तुलनामा केही पनि होइन। न्यायको लडाइँ अझै बाँकी छ। मेरो बोल्ने समय आउनेछ र हिसाबकिताब पनि बाँकी नै छ।" उनले यो मुद्दालाई राजनीतिक प्रतिशोधको रूपमा चित्रित गर्दै आएका छन्।यो रिहाइ बुटवलको सुप्रिम सहकारी ठगी प्रकरणसँग जोडिएको छ। अदालतले लामिछानेलाई पाँच मुख्य सर्तसहित थुनामुक्त गरेको छ:
- यसअघि जिल्ला अदालतले माग गरेको धरौटी निरन्तर राख्ने।
- मुद्दाको सुनुवाइमा अनुपस्थित नहुने।
- विदेश यात्रा गर्दा अदालतलाई पूर्वजानकारी दिने।
- प्रमाण नष्ट नगर्ने वा साक्षीहरूलाई प्रभावित नपार्ने।
- अन्य आवश्यक सर्त पालना गर्ने।
