एअर इण्डिया विमान दुर्घटनाः पाइलटका पिताद्वारा सर्वोच्च अदालतमा न्यायिक छानबिनको माग

नयाँ दिल्ली।  गत जुन १२ मा अहमदाबाद विमानस्थलबाट उडान भरिसकेपछि दुर्घटनामा परेको एअर इण्डियाको बोइङ ७८७-८ ड्रीमलाइनर विमानका पाइलट क्याप्टेन सुमित सभरवालको मृत्यु प्रकरणमा उनका पिताले भारतको सर्वोच्च अदालतमा न्यायिक निगरानीमा आधारित निष्पक्ष छानबिनको माग गर्दै याचिका दायर गरेका छन्। यो याचिकामा भारतीय पाइलटहरूको महासंघ (Federation of Indian Pilots – FIP) पनि पक्षकारका रूपमा सामेल छ।

याचिकामा भनिएको छ कि दुर्घटनापछि विमान दुर्घटना अन्वेषण ब्युरो (AAIB) ले तयार पारेको प्रारम्भिक रिपोर्ट पूर्वाग्रही र अपूरो छ। उक्त रिपोर्टमा मुख्य दोष पाइलट त्रुटिलाई दिइएको छ, तर गम्भीर प्रविधिक समस्या र प्रणालीगत कमजोरीहरूलाई बेवास्ता गरिएको आरोप लगाइएको छ। याचिकाकर्ताहरूका अनुसार, यसरी पाइलटलाई मात्र दोष दिएर अन्य पक्षहरूलाई उन्मुक्ति दिन खोजिएको छ।याचिकामा थप भनिएको छ कि छानबिन टोलीमा नागरिक उड्डयन महानिर्देशनालय (DGCA) र विभिन्न राज्यका उड्डयन निकायहरूका अधिकारीहरू रहेका छन्, जसको कारण "संस्थागत हितको टकराव (conflict of interest)" उत्पन्न भएको छ। ती निकायहरू आफैं नियमन, निरीक्षण र सुरक्षा सुनिश्चित गर्ने जिम्मेवारीमा रहेका हुँदा उनीहरूले गरेका सम्भावित गल्तीको छानबिन गर्न सक्षम हुने कुरामा प्रश्न उठाइएको छ।याचिकाकर्ताहरूले वर्तमान AAIB द्वारा भइरहेको छानबिन रोक्न माग गरेका छन् र यसको सट्टा एक स्वतन्त्र र निष्पक्ष छानबिन समिति गठन गरिनु पर्ने, जसमा न्यायालयको प्रत्यक्ष निगरानी रहने व्यवस्था हुनुपर्ने बताएका छन्। यस्तो छानबिनले मात्र पीडित परिवार र नागरिक उड्डयन क्षेत्रको दीर्घकालीन सुरक्षाको लागि सत्य तथ्य बाहिर ल्याउन सक्ने विश्वास याचिकाकर्ताहरूले व्यक्त गरेका छन्।क्याप्टेन सुमित सभरवालको निधनपछि उनका पिता जुन १७ मा मुम्बईमा अन्तिम श्रद्धाञ्जली दिँदै छोराको शवसँग उभिएको भावुक क्षण अहिले पनि धेरैको स्मृतिमा ताजै छ। यो घटनाले देशभरि उड्डयन सुरक्षाबारे गम्भीर प्रश्नहरू उठाइरहेको छ।