प्रतिबन्ध लगाए पनि नेपाली महिला श्रमिकको संख्या खाडी मुलुकमा बढ्दो

सरकारले एक दशकअघि खाडी मुलुकमा घरेलु श्रममा प्रतिबन्ध लगाए पनि नेपाली महिला श्रमिकको संख्या त्यहाँ बढ्दो छ। २०७३ मा संसदको निर्देशनअनुसार श्रम मन्त्रालयले प्रतिबन्ध लगाएको थियो। तर, मानव तस्करले भिजिट भिसामार्फत महिलालाई पठाउने क्रम बढेको नेपाली दूतावासको अध्ययनले देखाएको छ।

दूतावासका प्रतिवेदनअनुसार युएईमा ६० हजार, कुवेतमा ५० हजार, ओमानमा १० हजार र इराकमा २० हजार नेपाली महिला घरेलु श्रमिक छन्। कुवेतको सेल्टरमा ९० जना उद्धारको पर्खाइमा छन्। प्रतिबन्धले तस्करीको जालो झन् बलियो भएको र उद्धारमा कठिनाइ भएको दूतावासले बताएको छ।

साउदी अरबमा कार्यरत बागलुङकी दुर्गा सार्कीले भिजिट भिसामार्फत आएर परिवारको खर्च धानेको बताइन्। सिन्धुपाल्चोककी रीना तामाङले इराकको कुर्दिस्तानमा नेपाली महिलाको संख्या बढेको र प्रतिबन्धले बाटो नरोकिएको उल्लेख गरिन्।

राष्ट्रिय मानवअधिकार आयोग र गैरआवासीय नेपाली संघले प्रतिबन्ध हटाएर व्यवस्थित प्रणाली बनाउन सुझाएका छन्। कुवेतमा म्यानपावर कम्पनीले ७५० कुवेती दिनार लिएर श्रमिक पठाउने गरेको र ओमानमा मासिक १५–३७ जना उद्धार खोज्दै दूतावास पुग्ने गरेको तथ्यांक छ।

श्रम मन्त्रालयले युएईसँग ‘पाइलट प्रोजेक्ट’ मार्फत ५ हजार महिला श्रमिक पठाउने तयारी गरेको छ। न्यूनतम तलब ४ सय डलर र २४ घण्टे बिमाको व्यवस्था गरिएको मन्त्री शरतसिंह भण्डारीले बताए। तर, आप्रवासनविज्ञले सुरक्षित श्रमको ग्यारेन्टी र प्रभावकारी संयन्त्र आवश्यक रहेको औंल्याए।