खाडी देशहरूको हवाई क्षेत्र बन्द हुँदा काठमाडौंबाट ३१ अन्तर्राष्ट्रिय उडान रद्द

काठमाडौँ विमानस्थलले जारी गरेको विज्ञप्तिअनुसार, खाडी क्षेत्रका केही देशहरूको हवाई क्षेत्र अस्थायी रूपमा बन्द भएपछि काठमाडौं आउने र जाने ३१ अन्तर्राष्ट्रिय उडान प्रभावित भएका छन्।प्रभावित एयरलाइन्सहरूमा जजिरा एयरवेज, कुवेत एयरवेज, एयर अरेबिया, फ्लाइ दुबई, नेपाल एयरलाइन्स, कतार एयरवेज र हिमालय एयरलाइन्स रहेका छन्। रद्द भएका उडानहरूमा कुवेत–काठमाडौं–कुवेत, शारजाह–काठमाडौं–शारजाह, अबुधाबी–काठमाडौं–अबुधाबी, दुबई–काठमाडौं–दुबई, दोहा–काठमाडौं–दोहा र काठमाडौं–दोहा सेक्टर समावेश छन्।

विशेष गरी एयर अरेबिया र फ्लाइ दुबईका केही उडानहरू मंगलबारसम्म रद्द रहने जनाइएको छ। यसअघि शनिबार र आइतबार ४१ उडान रद्द भएका थिए, जसका कारण करिब ६,८०० यात्रु अलपत्र परेका थिए।खाडी क्षेत्र बन्द गरिएका देशहरूमा कतार, संयुक्त अरब इमिरेट्स (युएई), कुवेत, इरान, इराक, इजरायल, जोर्डन, लेबनान र बहराइन रहेका छन्।

विमानस्थलले यात्रु व्यवस्थापनलाई सहज र प्रभावकारी बनाउन सम्बन्धित एयरलाइन्स तथा निकायसँग समन्वय भइरहेको जानकारी दिएको छ। यात्रुहरूलाई आफ्नो उडानसम्बन्धी थप जानकारी वा पुनर्तालिकाका लागि सम्बन्धित एयरलाइन्ससँग सम्पर्क गर्न आग्रह गरिएको छ।