भाइटीकाको उत्तम साइत आज बिहान ११ बजेर ३९ मिनेटमा

आज लक्ष्मी पूजाका दिन स्थापना गरिएका दियो, कलश र गणेशको पूजा गरी मुख थालीमा अष्टदल लेखेर विभिन्न देवताहरूको पूजाआराधना गरिन्छ। त्यसपछि दिदीबहिनीले दाजुभाइलाई तेलको धाराले छेकी परम्पराअनुसार टीका लगाइदिन्छन् र मखमली, सयपत्री वा गोदावरीजस्ता फूलका माला लगाइदिन्छन्।शास्त्रीय मान्यताअनुसार, भाइटीकामा लगाइने टीका पाँच रंगको हुनुपर्छ—रातो, सेतो, पहेंलो, हरियो र नीलो। टीका लगाएपछि दिदीबहिनीले दाजुभाइलाई ओखर, कटुस, मसला र सेलरोटी जस्ता खानेकुरा दिन्छन् भने दाजुभाइले पनि दिदीबहिनीलाई सौभाग्यका प्रतीक कपडा र दक्षिणा दिएर सम्मान प्रकट गर्छन्।