नक्कली भुटानी शरणार्थी ठगी प्रकरण: फरार प्रतिवादी निरन्जनकुमार खरेल पक्राउ

काठमाडौं– नक्कली भुटानी शरणार्थी बनाएर अमेरिका पु¥याउने लोभ देखाएर पीडितहरूबाट करोडौं रुपैयाँ ठगी गर्ने गिरोहका एक फरार सदस्यलाई प्रहरीले अन्ततः पक्राउ गरेको छ। रौतहटको फतुवा हर्साह–९ निवासी ४२ वर्षीय निरन्जनकुमार खरेल उर्फ निराजनलाई केन्द्रीय अनुसन्धान ब्युरो (सीआईबी) ले गत शुक्रबार पक्राउ गरी आज काठमाडौं जिल्ला अदालतमा पेस गरेको छ।

सीआईबीका एसएसपी शिव कुमार श्रेष्ठका अनुसार, खरेलविरुद्ध आर्थिक वर्ष २०७९–०८० मा काठमाडौं जिल्ला प्रहरी परिसरमा ठगी, लिखत किर्ते, राज्यविरुद्ध अपराध र संगठित अपराधसम्बन्धी मुद्दामा जाहेरी दर्ता भएको थियो। अनुसन्धानका क्रममा उनलाई फरार प्रतिवादीको रूपमा सूचीकृत गरिएको थियो। प्रहरीले खरेलले ठगीबाट संकलित रकम जम्मा गर्ने, ओसारपसार गर्ने तथा गैरकानुनी रूपमा कागजात किर्ते गरी पीडितहरूबाट पैसा असुल्ने गिरोहसँग मिलेमतो गरेको ठहर गरेको छ।

यो प्रकरणले विगतका वर्षहरूमा नेपालीहरूलाई भुटानी शरणार्थीको कोटामा अमेरिका पु¥याउने प्रलोभन देखाएर ठगी गर्ने सञ्जालको पर्दाफास गरेको थियो। यसअघि नै यो मुद्दामा राजनीतिक व्यक्तित्वहरूको संलग्नतासमेत चर्चामा थियो, जसमा पूर्वगृहमन्त्रीहरू रामबहादुर थापा र बालकृष्ण खाणका नाम जोडिएका थिए। तर, खरेलको पक्राउले अनुसन्धानलाई नयाँ मोड दिन सक्ने प्रहरीको भनाइ छ।

सीआईबीले खरेललाई अदालतमा पेस गरेपछि थप अनुसन्धान र कारबाही अघि बढाइने जनाएको छ। यो घटनाले शरणार्थी ठगीका पीडितहरूमा न्यायको आशा जगाएको छ, तर यस्ता संगठित अपराध रोक्न थप कडा निगरानीको आवश्यकता रहेको विज्ञहरूले औंल्याएका छन्।