प्रचण्डको आह्वानः निष्पक्ष निर्वाचनबाट मात्रै राजनीतिक संकटको निकास सम्भव
- Dec Wed, 2025
- in बिजिनेस प्रेस
काठमाडौं। नेपाली कम्युनिष्ट पार्टी (नेकपा) का संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले वर्तमान राजनीतिक जटिलताको निकास निष्पक्ष, स्वतन्त्र र भयरहित वातावरणमा समयमै निर्वाचन सम्पन्न गर्नुमै रहेको स्पष्ट पारेका छन्।
नेपाल उद्योग वाणिज्य महासंघद्वारा आयोजित ‘शान्ति, स्थायित्व र समृद्धिका लागि सहकार्यः सामूहिक पहल’ कार्यक्रममा बोल्दै संयोजक दाहालले निर्वाचनमार्फत नयाँ जनादेश प्राप्त गरी संसद् पुनःस्थापना गर्नु नै अहिलेको प्रमुख कार्यभार भएको बताए।
उनले भने, “शान्ति, स्थायित्व र समृद्धिका लागि निष्पक्ष र भयरहित वातावरणमा निर्वाचन सम्पन्न गरेर नयाँ संसद् स्थापना गर्नुपर्छ। नयाँ संसद्ले संविधानमा रहेका अन्योलता हटाउने काम गर्नेछ।”
पछिल्ला राजनीतिक घटनाक्रम तथा ‘जेनजी’ आन्दोलनले पुरानो राजनीतिक सोच र स्थापित शक्तिलाई आत्मसमीक्षातर्फ बाध्य पारेको उल्लेख गर्दै उनले दलका नेतृत्व तहले आफ्ना कमजोरी पहिचान गरी सुधारतर्फ उन्मुख हुनुपर्नेमा जोड दिए।
“हामीले आफ्नै आत्मसमीक्षा गरेर कमजोरी कहाँ भयो भनेर खोज्नुपर्छ। स्थापित शक्तिहरू अब नागरिकको आवश्यकतालाई केन्द्रमा राखेर अघि बढ्ने वा आफ्नो औचित्य सकियो भनेर पाखा लाग्ने मोडमा पुगेका छन्,” प्रचण्डले स्पष्ट पारे।
उनले निर्वाचनलाई केवल राजनीतिक प्रतिस्पर्धाको रूपमा मात्र नभई राष्ट्रिय सहमति निर्माण गर्ने ऐतिहासिक अवसरका रूपमा लिनुपर्ने धारणा राखे।
“जेनजी आन्दोलनपछि हामीले राष्ट्रिय सहमति र राष्ट्रिय राजनीतिक एकतामा जानुपर्छ भनेका थियौँ। अहिले क्रमशः सर्वपक्षीय सहमतिको वातावरण बन्दै गएको छ,” उनले बताए।
संयोजक दाहालले वर्तमान सरकारले चुनौतीपूर्ण परिस्थितिका बीच पनि निर्वाचन सम्पन्न गर्ने वातावरण बनाउन सफल भएको दाबी गर्दै अब अन्योल होइन, निर्वाचन केन्द्रित सोच आवश्यक भएको बताए।
“के हुन्छ भन्ने अन्योलभन्दा अब निर्वाचनमा केन्द्रित हुनुपर्छ। सरकारले अप्ठ्याराबीच पनि विकल्प निर्वाचन नै हो भन्ने वातावरण बनाउँदै गएको छ,” उनले भने।
उनको भनाइले वर्तमान राजनीतिक संक्रमणकालको समाधान लोकतान्त्रिक अभ्यास, नयाँ जनादेश र व्यापक राष्ट्रिय सहमतिमार्फत मात्रै सम्भव हुने सन्देश दिएको छ।
