नेपालले वेस्ट इन्डिजलाई हराएर रच्यो इतिहास, प्रचण्डद्वारा क्रिकेट टोलीलाई बधाई

काठमाडौँ– नेपालको राष्ट्रिय क्रिकेट टोलीले युएईमा जारी युनिटी कपअन्तर्गत शनिबार राति भएको खेलमा दुई पटकको विश्वकप विजेता वेस्ट इन्डिजलाई हराएर ऐतिहासिक विजय हासिल गरेको छ। यो जितलाई नेकपा माओवादी केन्द्रका संयोजक पुष्पकमल दाहाल 'प्रचण्ड'ले नेपाली युवाशक्तिको उत्कृष्ट क्षमता र अनुशासनको प्रमाणका रूपमा प्रशंसा गर्दै टोलीलाई बधाई दिएका छन्।शारजाह क्रिकेट स्टेडियममा भएको खेलमा नेपालले पहिले ब्याटिङ गर्दै निर्धारित २० ओभरमा १४९ रनको लक्ष्य प्रस्तुत गरेको थियो। जवाफमा वेस्ट इन्डिजले २० ओभरमा ९ विकेट गुमाउँदै १२९ रनमात्र बनाउन सक्यो। यो जितले नेपाली क्रिकेट टोलीले अन्तर्राष्ट्रिय मञ्चमा आफ्नो बलियो उपस्थिति देखाएको छ।प्रचण्डले सामाजिक सञ्जालमा लेखे, "यूएईमा जारी युनिटी कपअन्तर्गत पहिलो खेलमा नेपालको राष्ट्रिय क्रिकेट टोलीले दुई पटकको विश्वकप विजेता वेस्ट इन्डिजलाई हराउँदै ऐतिहासिक विजय हासिल गरेकोमा हार्दिक बधाई दिन्छु। यो सफलताले नेपाली युवाशक्ति– उत्कृष्ट क्षमता, अनुशासन र राष्ट्र निर्माणप्रतिको सङ्कल्पबाट हरेक चुनौती सामना गर्न सक्षम छ भन्ने पुष्टि गरेको छ।" उनले थपे, "नेपाली टोलीले सिरिजका आगामी खेलहरूमा समेत अझै उत्कृष्ट प्रदर्शनमार्फत देशलाई गौरवान्वित पार्ने विश्वास लिएको छु।"

यो जितले नेपालको क्रिकेट इतिहासमा नयाँ अध्याय थपेको छ। वेस्ट इन्डिजजस्तो बलियो टोलीविरुद्धको यो विजयले नेपाली टोलीको आत्मविश्वास बढाउनुका साथै विश्व क्रिकेटमा नेपालको सम्भावनालाई उजागर गरेको छ। युनिटी कपको यो सिरिजमा नेपालले आगामी खेलहरूमा पनि यस्तै प्रदर्शन दोहोर्‍याउने अपेक्षा गरिएको छ।नेपाल क्रिकेट सङ्घ (क्यान) र समर्थकहरूले पनि सामाजिक सञ्जालमार्फत टोलीलाई बधाई दिँदै आगामी खेलहरूमा थप सफलताको शुभकामना दिएका छन्।