खिचातानी चरम उत्कर्षमा पुगेका बेला नेपाली कांग्रेसले बोलायो केन्द्रीय कार्यसम्पादन समितिको आकस्मिक बैठक

नेपाली कांग्रेसभित्रको आन्तरिक राजनीतिक खिचातानी चरम उत्कर्षमा पुगेका बेला पार्टीले केन्द्रीय कार्यसम्पादन समितिको आकस्मिक बैठक बोलाएको छ। मुख्यसचिव कृष्णप्रसाद पौडेलका अनुसार भोलि शुक्रबार दिउँसो ३ बजे पार्टी केन्द्रीय कार्यालय सानेपामा बस्ने गरी यो महत्त्वपूर्ण बैठक आह्वान गरिएको हो। विशेषगरी दुई महामन्त्रीहरू गगन थापा र विश्वप्रकाश शर्माले बिहीबार १५औँ नियमित महाधिवेशन स्थगित भएको घोषणा गर्दै अब विशेष महाधिवेशनको प्रक्रिया अघि बढाउने सार्वजनिक सूचना जारी गरेपछि कांग्रेसभित्र संवैधानिक र राजनीतिक संकट पैदा भएको छ।

यही बदलिएको परिस्थितिको समीक्षा गर्न र पार्टीको आधिकारिक धारणा तय गर्न सभापति शेरबहादुर देउवाले कार्यसम्पादन समितिका पदाधिकारी एवं सदस्यहरूलाई छलफलका लागि बोलाउनुभएको हो। नियमित महाधिवेशनको कार्यतालिका प्रभावित भई पार्टीको वैधानिकतामाथि नै प्रश्न उठ्न सक्ने जोखिम देखिएकाले यो बैठकलाई निकै चासोका साथ हेरिएको छ। महामन्त्रीद्वयले पुस २७ देखि २९ गतेसम्मका लागि विशेष महाधिवेशनको मिति समेत प्रस्ताव गरिसकेको अवस्थामा संस्थापन पक्षले यसलाई कसरी लिन्छ र कस्तो कानुनी उपचार खोज्छ भन्ने कुरा भोलिको बैठकले तय गर्नेछ।

पार्टी विधान र निर्वाचन आयोगको समयसीमाका कारण कांग्रेस यतिबेला दबाबमा छ। एकातिर महामन्त्रीहरूले विधानको रक्षाका लागि विशेष महाधिवेशनको बाटो रोजेका छन् भने अर्कोतिर संस्थापन पक्षले यसलाई विद्रोहको रूपमा हेरेको छ। सानेपामा बस्ने यो बैठकले विशेष महाधिवेशनको औचित्य, नियमित महाधिवेशनको नयाँ मिति वा पार्टीभित्रको बढ्दो ध्रुवीकरणलाई कम गर्ने मध्यम मार्गका बारेमा ठोस निर्णय लिनुपर्ने चुनौती छ। यस बैठकको निर्णयले नै नेपाली कांग्रेसको आगामी साङ्गठनिक स्वरूप र नेतृत्वको भविष्य निर्धारण गर्ने देखिन्छ।