माओवादी केन्द्रको केन्द्रीय समिति महाधिवेशन आयोजक समितिमा रुपान्तरण, प्रचण्ड संयोजक बने

काठमाडौं- नेकपा माओवादी केन्द्रको दुई दिनसम्म चलेको केन्द्रीय समितिको बैठकले आफूलाई महाधिवेशन आयोजक समितिमा रुपान्तरण गरेको छ। यो निर्णयसँगै पार्टी अध्यक्ष पुष्पकमल दाहाल 'प्रचण्ड' पनि अध्यक्षबाट संयोजक बनेका छन्। काठमाडौंको प्रज्ञा भवनमा सम्पन्न बैठकपछि प्रचण्डले पत्रकारहरूसँग कुरा गर्दै भने, "म अब अध्यक्ष रहिनँ, संयोजक भएँ।"

यो अभिव्यक्ति पार्टीभित्र प्रचण्डको नेतृत्वमाथि उठेको सानो तर अर्थपूर्ण आवाजको सन्दर्भमा महत्वपूर्ण मानिएको छ। वरिष्ठ नेता नारायणकाजी श्रेष्ठले प्रचण्डलाई अध्यक्ष पद छाड्न र आफूलाई कार्यवाहक अध्यक्षको जिम्मेवारी दिन प्रस्ताव राखेका थिए। यस्तै, उपमहासचिव जनार्दन शर्माले नयाँ टिम ल्याउने र हालका पदाधिकारीलाई निर्देशक समितिमा रुपान्तरण गर्ने प्रस्ताव राखेका थिए। तर, यी दुवै प्रस्ताव अस्वीकृत भए।

माओवादी नेता देवेन्द्र पौडेलका अनुसार आगामी मंसिरको अन्तिम सातासम्म विशेष महाधिवेशन सम्पन्न गर्ने निर्णय भएको छ। यो अवधिमा छरिएर रहेका र विचार मिल्ने कम्युनिस्ट पार्टीहरूसँग एकताको पहल गर्ने जिम्मेवारी पनि प्रचण्डलाई दिइएको छ। नेता रहिश साहले यदि एकता भएमा एकता महाधिवेशन हुने र पार्टीको नामसमेत परिवर्तन हुन सक्ने बताए।माओवादी नेता माधव सापकोटाले प्रचण्डको नेतृत्वमा निरन्तरताको पक्षमा तीन तर्क प्रस्तुत गरेका छन्। अधिकांश केन्द्रीय सदस्यले प्रचण्डको नेतृत्वमा अगाडि बढ्नुपर्ने मत राखे। केन्द्रीय समिति र अध्यक्ष महाधिवेशनबाटै चयन भएकाले अर्को महाधिवेशनसम्म नेतृत्व परिवर्तनको प्रश्न नउठ्ने।बिचमा नेतृत्व परिवर्तनको आवश्यकता नदेखिएको र प्रक्रियाबाटै नेतृत्व चयन हुने।

प्रचण्डले पार्टी र आफूलाई समयानुसार रुपान्तरण गर्न जे गर्नुपर्छ, त्यो गर्न तयार रहेको बताएका छन्। बैठकले पार्टीका नेताहरूको सम्पत्ति छानबिन गर्न शक्तिशाली आयोग गठन गर्ने, नेपोटिज्म (परिवारवाद) को आरोपलाई सम्बोधन गर्न कार्यविधि बनाउने र नेताहरूको कार्यशैली सुधार्न नीति बनाउने निर्णय गरेको छ। प्रचण्डले सबै नेताहरूको एकाघरको सम्पत्ति सार्वजनिक गर्ने घोषणा गरेका छन्।

जेनजी आन्दोलनले उठाएका मुद्दालाई सम्बोधन गर्न प्रचण्डले पार्टीका सबै संरचनामा युवाहरूको अनिवार्य सहभागिता सुनिश्चित गर्ने निर्देशन दिएका छन्। उनले हालै जेनजी प्रतिनिधिहरूसँगको भेटमा उनीहरूले कम्तीमा २५ प्रतिशत प्रतिनिधित्व माग गरेको उल्लेख गर्दै अधिकतम समावेशीकरण गर्ने नीति पारित भएको बताए।प्रचण्डले आफ्नो नेतृत्व बलजफ्ती नभई ऐतिहासिक परिस्थितिको उपज भएको बताए। उनले २०४६ को जनआन्दोलन, जनयुद्ध, शान्ति सम्झौता, संविधानसभा र गणतन्त्र स्थापनामा आफ्नो भूमिकालाई स्मरण गराए। उनले भने, "जिम्मेवारीबाट पन्छिने मेरो स्वभाव होइन, तर पदलोलुपता पनि मेरो चरित्र होइन।"केन्द्रीय समितिमा ९५ प्रतिशतभन्दा बढी सदस्यले प्रचण्डको नेतृत्वको समर्थन गरेको र नारायणकाजीको प्रस्तावलाई कसैले समर्थन नगरेको नेताहरूले बताए। माओवादी नेतृ सीता थेवेले प्रचण्डको तदारुकताको प्रशंसा गर्दै अन्य दलले माओवादीबाट सिक्नुपर्ने बताइन्।

माओवादीले फागुन २१ मा हुने प्रतिनिधिसभा चुनाव र विशेष महाधिवेशनलाई प्राथमिकतामा राखेको छ। प्रचण्डले असहमत पक्षलाई समेत समेटेर अगाडि बढ्ने प्रतिबद्धता जनाएका छन्। साथै, उनले डिजिटल दक्षता र आधुनिक प्रविधिलाई जोड दिँदै पार्टीलाई समयानुकूल बनाउने बताए।प्रचण्डको नेतृत्वमा माओवादी केन्द्रले आफूलाई रुपान्तरण गर्ने, जेनजीको माग सम्बोधन गर्ने, सम्पत्ति छानबिन गर्ने र परिवारवादको अन्त्य गर्ने प्रतिबद्धता जनाएको छ। यी कदमले माओवादीले बदलिएको राजनीतिक परिस्थितिमा आफूलाई सान्दर्भिक राख्ने प्रयास गरेको देखिन्छ। प्रचण्डको नेतृत्व शैली र उनको समर्थनको बलियो आधारले आगामी दिनमा माओवादीको दिशा कस्तो हुन्छ, त्यो विशेष महाधिवेशनले निर्धारण गर्नेछ।