नेपालको सफल एयरलाइन्स बुद्ध एयरका संस्थापक वीरेन्द्रबहादुर बस्नेत नयाँ राजनीतिक दल गठनको तयारीमा !

काठमाडौं– नेपालको आन्तरिक उड्डयन क्षेत्रमा क्रान्तिकारी परिवर्तन ल्याउने बुद्ध एयरका प्रबन्ध निर्देशक तथा सफल उद्यमी वीरेन्द्रबहादुर बस्नेतले राजनीतिक क्षेत्रमा कदम राख्ने तयारी तीव्र पारेका छन्। निकट स्रोतका अनुसार, बस्नेतले देशको दीर्घकालीन विकास र सुशासनका लागि नयाँ राजनीतिक दल गठन गर्ने योजनामा कार्यरत छन्। यो कदमले नेपाली राजनीतिमा नयाँ आशाको किरण ल्याउने अपेक्षा गरिएको छ।बस्नेत, जसले बुद्ध एयरलाई नेपालको आकाशमा ६७% बजार हिस्सा हासिल गराएका छन्, अब धर्तीमा उडान भर्दैछन्। उनको टिमले देशभरका प्रतिष्ठित उद्यमी, व्यवसायी र समाजसेवीहरूसँग छलफललाई तीव्रता दिएको छ। निकटवर्ती समाजशास्त्री तथा व्यवसायी दिनेश प्रसाईंको नेतृत्वमा रहेको यो टिमले बूढानीलकण्ठ स्कूलका पुराना सहपाठीहरूको सहकार्यमा काम गरिरहेको छ। 'हामीले देशका विभिन्न क्षेत्रका अब्बल व्यक्तिहरूलाई समेटेर एक मजबुत राजनीतिक शक्ति निर्माण गर्ने छौं,' बस्नेतका एक विश्वस्त स्रोतले बताए।नयाँ दलको मूल नीति सुशासन, युवा रोजगार सिर्जना र उद्यमशीलतामा केन्द्रित रहनेछ। 'मुलुकको दीर्घकालीन हितका लागि राजनीतिक परिवर्तन आवश्यक छ।

हामी पदको लोभमा होइन, देश र नागरिकलाई के दिन सकिन्छ भन्ने भावनाले प्रेरित हुन्छौं,' स्रोतले उद्धृत गर्दै भने। पार्टीले कुनै पनि व्यवस्था, दल वा व्यक्तिलाई आलोचना नगरी सकारात्मक दृष्टिकोण अपनाउने नीति लिने जनाइएको छ। नेतृत्व चयनमा पनि खुलापन रहनेछ – योग्यता र दक्षतामा आधारित हुनेछ।यो तयारीकै क्रममा पूर्वमन्त्री सुमना श्रेष्ठसँग भेटघाट भएको छ भने राष्ट्रिय स्वतन्त्र पार्टी (रास्वपा) का असन्तुष्ट नेताहरूसँग पनि छलफल भइरहेको छ। रास्वपाका एक नेताले भने, 'बस्नेतको टिमले हामीलाई नयाँ दलमा सामेल हुने प्रस्ताव गरेका थिए। तर उनीहरू नयाँ बाटोमा अघि बढ्ने निधोमा छन्।' यसले राजनीतिक क्षेत्रमा नयाँ गठबन्धनको सम्भावना बढाएको छ।केही दिनभित्र नै पार्टीको नाम र घोषणापत्र सार्वजनिक गर्ने तयारी छ। बस्नेतले यसअघि नै कृषि उद्यम र पर्यटन विकासमा ठूला लगानी गरेका छन्, जसले उनको दृष्टिकोणलाई प्रमाणित गर्छ। राजनीतिक विश्लेषकहरूका अनुसार, यो दलले युवा र उद्यमी वर्गलाई आकर्षित गर्न सक्छ, जसले पुराना दलहरूलाई चुनौती दिनेछ।नेपालको राजनीतिमा व्याप्त भ्रष्टाचार र बेरोजगारीका विरुद्ध यो नयाँ शक्तिले आशा जगाएको छ। बस्नेतको सफलताको कथा – बुद्ध एयरबाट वार्षिक ४ अर्बको कारोबार – ले उनी राजनीतिमा पनि उतिकै प्रभावकारी हुन सक्ने संकेत गर्छ। के यो दलले नेपाललाई नयाँ उडान दिन्छ ? हेर्न बाँकी छ !