तनाव कम गर्नका लागि वार्ताको प्रयास

नेपाली सेनाको पहलमा जेनजी युवाहरूको भ्रष्टाचारविरोधी प्रदर्शनले उत्पन्न तनाव कम गर्नका लागि वार्ताको प्रयास भएको छ। स्रोतका अनुसार, नेपाली सेनाको मुख्यालय जंगीअड्डामा मध्यरातमा जेनजी समूहका प्रतिनिधिहरूसँग छलफल भएको छ।

यस छलफलमा विभिन्न जेनजी समूहका प्रतिनिधिहरूले प्रधानसेनापति अशोकराज सिग्देलसँग भेटेर आफ्ना मागहरू राखेका थिए। एक जेनजी अभियन्ताले पनि आफूहरू जंगीअड्डामा गएर आफ्ना कुरा राखेको बताएका छन्।

नेपाली सेनाका एक उच्च अधिकारीले यस भेटलाई औपचारिक वार्ता नभई जेनजीका धारणाहरू बुझ्ने प्रारम्भिक प्रयासको रूपमा अर्थ्याएका छन्। उनका अनुसार, यसको औपचारिक वार्ता भोलि नेपाली सेनाका परमाधिपतिसमेत रहेका राष्ट्रपति रामचन्द्र पौडेलको उपस्थितिमा हुनेछ। यस छलफलको मुख्य उद्देश्य जेनजी युवाहरूको माग सुन्नु र प्रारम्भिक छलफल गर्नु रहेको छ।