काठमाडौंमा सात देशका कलाकारको जमघट : ‘काठमाडौं इन्टरनेसनल परफरमेन्स आर्ट फेस्टिभल’ सुरु
- Nov Tue, 2025
- in कला क्यानभास
काठमाडौं । काठमाडौंको पाटन दरबार स्क्वायर क्षेत्रमा सात देशका कलाकारहरूको सहभागितामा ‘काठमाडौं इन्टरनेसनल परफरमेन्स आर्ट फेस्टिभल–२०२’ सुरु भएको छ । बिन्दु स्पेस फर आर्टिष्ट नेपालको आयोजना र नेपाल ललितकला प्रज्ञा–प्रतिष्ठानको सहकार्यमा मङ्गलबारदेखि सुरु भएको यो फेस्टिभल मंसिर १४ गतेसम्म चल्नेछ ।फेस्टिभलमा नेपाल, भारत, चीन, बङ्गलादेश, अष्ट्रिया, फिलिपिन्स र श्रीलङ्काका गरी २५ भन्दा बढी अन्तर्राष्ट्रिय कलाकारहरूले परफरमेन्स आर्ट, साइट–स्पेसिफिक प्रस्तुति, भिडियो आर्ट र अन्तर्क्रियात्मक कार्यशाला प्रस्तुत गर्दैछन् । यो फेस्टिभलको मुख्य उद्देश्य विभिन्न देशका कलाकारहरूबीच कला, संस्कृति र अनुभवको आदानप्रदान गर्नु रहेको आयोजक बिन्दु स्पेसकी संस्थापक रोजिना श्रेष्ठले बताइन् ।फेस्टिभलको उद्घाटन दिन नेपाल ललितकला प्रज्ञा–प्रतिष्ठानकी बहुआयामिक तथा अन्य सिर्जनात्मक कला विभाग प्रमुख सौरगङ्गा दर्शनधारीले ‘मेरो परिचय’ शीर्षकको परफरमेन्स प्रस्तुत गरिन् । उनले विवाहअघि र विवाहपछि महिलाले बोक्नुपर्ने फरक–फरक सामाजिक पहिचान र नामको बोझलाई शक्तिशाली ढङ्गले प्रस्तुत गरिन् । “जन्मेदेखि विवाहसम्म र विवाहपछि पनि हाम्रो पहिचान बारम्बार परिवर्तन गरिन्छ, तर हामी आफैं को हौं भन्ने प्रश्न हराइरहन्छ,” उनले भनिन् ।यसैगरी, चिनियाँ कलाकार लि युले शरीर र स्मृतिसँग जोडिएको परफरमेन्स, बङ्गलादेशकी नुसरत सुल्तानाले जलवायु परिवर्तनको प्रभावमा आधारित प्रस्तुति र अस्ट्रियाली कलाकार क्लारा श्वार्जले साइट–स्पेसिफिक काम प्रस्तुत गरेका छन् । पाटन दरबार क्षेत्रका ऐतिहासिक आँगन, मन्दिर र खुला चोकहरूमा कलाकारहरूले दर्शकहरूसँगै अन्तर्क्रिया गर्दै प्रस्तुति दिइरहेका छन् ।फेस्टिभलमा दैनिक बिहान ११ बजेदेखि साँझ ६ बजेसम्म चल्नेछ । मुख्य स्थानहरूमा पाटन दरबार स्क्वायर, क्वबहाल, बिन्दु स्पेस ग्यालरी र नेपाल आर्ट काउन्सिल परिसर छन् ।आयोजकका अनुसार, यो फेस्टिभलले नेपालमा परफरमेन्स आर्टको विकासमा ठूलो योगदान पुर्याउँदैछ । “परम्परागत चित्रकला र मूर्तिकलाबाट माथि उठेर शरीर, समय र स्थानसँग जोडिएको कलाको नयाँ भाषा विकास गर्न यो फेस्टिभल कोसेढुङ्गा बन्दैछ,” बिन्दु स्पेसले जनाएको छ ।फेस्टिभल अवधिभर कलाकारहरूले कार्यशवस्थान, सुन्धारा, लगनखेल र जावलाखेलमा पनि खुला प्रस्तुति दिनेछन् । प्रवेश निःशुल्क छ ।
